世仇白蘭恩落難 華拉倫加踩多腳

猪拉多纳

29/04/2012
文： 渡邊年

挪超今晚獨腳戲上演褪色國家打吡，白蘭恩主場對華拉倫加，兩支球隊積怨甚深，由政治到體育都鬥餐死，白蘭恩近況差到震，華拉倫加見到掩住嘴偷笑，肯定想踩多腳，今仗白蘭恩仲要讓波，華拉倫加「讓球客勝」要捧。（周一凌晨1時開賽）


兩軍嘅積怨緣於佢哋所處嘅城市，白蘭恩位於現時挪威第二大城市卑爾根，至於華拉倫加則位於首都奧斯陸，其實呢兩個地方百幾年嚟都為爭做首都爭個你死我活，早幾年奧斯陸市長仲曾經講過：「睇到白蘭恩做得差經常都係好事。」

華拉倫加受讓筍

兩地由政治鬥到去體育，白蘭恩同華拉倫加代表住兩地，球迷鬧到對方飛起，場內亦吓吓到肉，依家白蘭恩落難，聯賽五戰得三分排尾三，華拉倫加梗係想踢對方落谷底，即使作客都唔會踢守勢波。


事實上，華拉倫加上季曾大肆增兵，希望染指聯賽錦標，今季人腳冇大變動，目標仍然係爭冠軍，對住狀態低沉嘅白蘭恩必要搶分，依家仲有得受讓，真係筍到爆燈，1.65倍嘅「讓球客勝」好路。