阿仙奴讓球勝係咁諾飛

猪拉多纳

05/05/2012
文： 法達斯維

阿仙奴為保直入來屆歐聯分組賽的「三哥」位置，今晚主場迎戰諾域治絕對唔會手軟，加上呢場係兵工廠今季最後一場主場比賽，隊長尹佩斯定必施展渾身解數，於謝幕戰爭取士哥答謝球迷支持，「讓球主勝」非常值博。（有線300及200台周六晚7時45分直播）


齋睇積分榜，雖然阿仙奴位列第3，但他們只領先熱刺同紐卡素1分，其「三哥」位並不穩陣。另外，若果車路士奪得歐聯錦標，會令英超第4位球隊失去歐聯資格，因此存在不少變數。

尹佩斯仲要爭金靴

當然只要阿仙奴做好本分，餘下兩仗全勝，就會穩奪季席，毋須理會緊隨其後的紐卡素或熱刺的追趕。大家都知阿仙奴今季經歷多番起伏，尤其係季初以2比8被曼聯羞辱，球迷依然不離不棄的支持，成為球隊重上正軌的動力。今場在酋長球場謝幕，一眾「廠員」定必踢場好波答謝球迷支持，因此絕對唔會手軟。


另外，出爐英格蘭球員先生尹佩斯亦有任務，呢位阿仙奴隊長今季入球不斷，長居射手榜一哥，但季中一段小低潮，令曼聯射手朗尼愈追愈近，現時彼此只係差2球，尹佩斯要力保金靴，必須在餘下2輪努力爭取入波，加上外借的班拿約希望長留兵工廠，實會拚盡博教頭雲格留用，其戰意毋庸懷疑。

諾域治Hea踢等收咧

升班馬諾域治能提早上岸，其實已超額完成，近期已開始Hea踢，近8場聯賽輸5場，證明「金絲雀」上下已進入等收咧階段，面對有目標、有鬥心的阿仙奴，唔會阻人發達，捧「讓球主勝」好正路，另亦可留意入球大。