科隆救命博主Ｗ加大

猪拉多纳

05/05/2012
文： 車車

德甲煞科有線揀咗當中三場好戲碼直播，仲有賽後即場頒獎嘅開心慶祝片段，睇完場波記得唔好走開，好戲在後頭嘛！


三場直播賽事當中，我最有心水就係科隆主場對拜仁慕尼黑嗰場，原因好簡單，科隆明顯徘徊喺篤定降班同打護級附加賽之間，就算今場贏到都未算大步檻過，之後仲要踢附加賽先決定去留，但贏咗呢場就比哈化柏林多一個生還機會，所以仲有啲競爭味道！


（有線61及201台周六晚9時30分直播）

拜仁留力等兩項決賽

雖然科隆已經連續八場贏唔出。講真，淨係普多斯基同路華高域呢對「不和兄弟」爭波踢，就已經浪費咗季中多場贏波機會！如果最尾真係要降落德乙，都唔怪得任何人。不過，普多斯基下季都轉去阿仙奴，科隆係生定死都唔再關佢事喇！


至於拜仁慕尼黑，由於聯賽贏輸都冇咩所謂，留力德國盃對多蒙特上演番場復仇記好過，何況仲有5‧19歐聯決戰車路士呢！表面睇，雖然拜仁唔多在意呢場波，唯獨有個人例外，咪係馬里奧高美斯囉！佢依家喺神射手榜少亨特拉爾一球，所以呢場佢實行撻「行」副「偈」，爭取士哥。


上季拜仁喺聯賽次循環作客科隆，上半場拜仁先入兩球，下半場科隆入番三粒反勝，當中有兩球係路華高域入架！拜仁未來有兩場大賽後顧，所以呢場波我會睇好仲要護級嘅科隆多少少，再博多瓣入球大，希望主客兩邊都有波入。