C朗爭金靴 銀河艦隊玩大佢

猪拉多纳

05/05/2012
文： 力奇

新科西甲冠軍皇馬今晚出訪CF格蘭納達，向住佢哋聯賽總積分100分嘅目標邁進。士氣同狀態都喺高峰嘅佢哋更要協助首席球星C朗爭奪歐洲金靴獎，肯定唔會有保留，撞啱主隊幾近護級成功，心情輕鬆唔會踢得太保守，就算入球大細中位數去到3.5球，2.05倍「大」都值博。（now635台周日凌晨3：00直播）

CF格蘭納達火力唔曳

C朗目前喺歐洲金靴榜落後宿敵美斯2球，今鋪點會唔落力，最緊要係佢今場仲有前線好拍檔迪馬利亞波監刑滿復出，多咗供應自然唔愁冇波入啦！再者，教頭莫連奴都想造出西甲史上最高100分總分，家陣只要贏埋最後2輪就達成目標，今仗肯定有殺冇賠，只要「銀河艦隊」肯攻，入球唔難滾滾而來。


CF格蘭納達現以36戰得42分排15位，仲有2輪就高過護級安全線5分，除非有重大意外，佢哋要留級難度唔大。睇番佢哋近3場主場戰2勝1和入5球，火力唔算曳，加上皇馬近7戰有6場開大，呢口「大」點都追得過。