曼市爭標 唱紅打藍

猪拉多纳

06/05/2012
文： 蘇豪

英超上演倒數第二輪賽事，焦點落在曼市雙雄身上，曼城及曼聯同得83分，曼城靠8個得失球差領先做一哥，餘下兩仗全勝就好大機會封王，但今晚藍天使作客紐卡素「地獄球場」好難踢，作客根本冇本錢讓波；另一邊廂紅魔主場對史雲斯必以大勝為目標，「半場大」手到拿來！

史雲斯風流波 紅魔半場定大局

曼聯啱啱喺榜首大戰畀死敵曼城打敗跌落次席，爭標形勢由主動變被動，餘下兩戰唔單止要贏波，仲要盡量爭取士哥，今輪主場對史雲斯由第一分鐘就會開始狂攻，預期上半場已可連番士哥，可捧半場大！（有線300及200台周日晚11時直播）


英超爭標形勢清晰，曼市雙雄同得83分，曼聯球差落後8球，如果另一邊廂紐卡素阻唔到曼城，曼聯就要喺最後兩輪大炒對手先有機會創造奇迹。紅魔本來坐擁八分優勢，家陣搞到咁折墮，全因之前幾場唔夠肉緊，主帥費格遜上場竟然怕輸打少個前鋒，事實證明被動踢法完全唔適合佢哋，今次返主場大解放，雖有射手韋碧克受傷休戰，但可由「小豌豆」查維亞靴南迪斯夥拍朗尼攻堅，要撕破史雲斯防線並非難事。

史雲斯上岸無謂縮

史雲斯上岸後完全放鬆心情，上場仲同狼隊對攻，早於上半場已炮製六個士哥，非常誇張，最後仲被對手追成4比4，防線頗為鬆散，換轉呢場係季初賽事，史雲斯肯定唔會打得咁開放，不過依家大軍已經毫無顧慮，確實有條件大踢快樂足球，隊中主將史葛冼佳亞及基菲爾施古臣都有分量，今次對住勁旅曼聯，唔會一味死守坐以待斃。


睇番今場賠率，曼聯主勝熱至1.09倍冇肉食，投X價值唔大，「讓球主客和」開緊「-2」，紅魔要淨勝三球先開到，風險太高，不如轉向大細埋手。紅魔急需爭取士哥，唔會再歎慢板，上半場入球大盤中位數為1.5球，大盤值得一試。另外，全場大細中位數為3.5球，入球大亦可兼顧。