卡爾斯魯厄睇定食

猪拉多纳

德國聯賽附加賽（護級/升班）次回合賽事，德乙球隊卡爾斯魯厄回師主場再鬥德丙大軍雷根斯堡，雙方首回合各一言和，卡爾斯魯厄上場頂得住兼取得作客入球，雷根斯堡次回合作客焗攻，卡軍可以睇定嚟食！（周二凌晨2時30分開賽）

卡爾斯魯厄今季衰在作客腳軟，能夠取得德乙十六名踢附加賽避過直接降班厄運，全靠季尾主場四連勝，對手包括二哥法蘭克福及排第五嘅柏達邦。事實上，卡軍主場特醒，踢德乙應付自如，主場對住丙組仔勝算甚高。

雷根斯堡以德丙第三位身份出戰附加賽衝升班，呢支球隊喺03/04季度曾經喺德乙作賽，結果降班收場，之後喺低組別賽事載浮載沉，今季再次取得佳績，已經非常叻仔。
放虎歸山難翻盤

雷軍首回合喺主場一度領先，可惜未能保住勝局放虎歸山，兼且失作客入球，次回合作客焗攻追數，可惜佢哋作客唔係醒，恐怕亂攻之下更易被對手有機可乘，捧卡爾斯魯厄啱數。