歐國盃：波蘭中興靠蜜蜂3基

猪拉多纳

波蘭，一個畀人感覺幾神秘嘅國家，今個暑假將會成為全球球迷焦點。Katie細細個去過華沙一次，嗰度有充滿老城建築物嘅舊城區，又有新潮現代化嘅新城區，就好似佢哋嘅國家隊一樣，曾經喺球壇有過輝煌一頁，依家再由一班年輕新世代肩負重振雄風嘅任務，今屆歐國盃，波蘭值得大家期待架！

對波蘭印象唔多，返學讀西史就記得佢哋過去經歷過戰火連年。小妹對佢哋嘅足球認識都係一樣，知道波蘭喺74年同82年世盃攞過季軍，但係近呢十年八載已經唔覺佢哋有咩好成績，直到波蘭主辦今屆歐國盃，再留意番呢隊波，先發覺陣中原來有唔少好好波嘅新星！
3子撐起雙冠王多蒙特

講到呢期最紅嘅，梗係「蜜蜂3基」啦！羅拔利雲度夫斯基、比薛斯基同巴拉斯塞高斯基今季助多蒙特膺雙冠王，傳聞皇馬、曼聯都打緊佢哋主意，其中23歲嘅羅拔利雲度夫斯基喺德甲入咗22球，德國盃決賽更連中三元，毫無疑問，佢已經成為波蘭嘅靈魂人物。
華斯利斯基回歸踢中堅

同時，波蘭早排爆出嘅紀律問題亦告一段落，安德列治守將華斯利斯基之前因夜蒲鬧事打的士司機，一度被領隊施梅達除名，不過事件已經平息，華斯利斯基唔單止重返歐國盃大軍，呢位司職右閘嘅猛將尋日仲自爆會喺波蘭擔任中堅添，家陣呢隊波咁齊心，咪當佢哋係魚腩呀！

波蘭足球重新抬頭，領隊施梅達大膽起用新人亦應記一功。除咗「蜜蜂3基」，華斯利斯基、布斯克亦值得大家留意。今屆決賽周波蘭有主場之利，小組對手亦唔見有超班之輩，小妹覺得波蘭好大機會歷史性突破分組賽！