巴塞搶盃 歡送哥帥

猪拉多纳

哥迪奧拿入主巴塞後嘅首項錦標，係08/09球季擊敗畢爾包捧走嘅西班牙盃。彷彿係預先寫好嘅劇本一樣，今晚疲累不堪嘅哥帥喺任內最後一次領軍，咁啱就係再同「巴斯克雄獅」爭奪西班牙盃。相信一眾巴塞球員今晚必定踢出漂亮一仗，等哥帥呢段始於西盃嘅巴塞旅程以同一獎盃作結，畫上完美句號，「讓球客勝」熱至1.54倍都值得捧場。（now632台周六凌晨4:00直播）

小妹記得哥迪奧拿宣布離任時話過，上任嗰陣曾經興奮到好似細路仔咁周圍跳，無奈4個球季嘅巨大壓力已經榨乾呢位少帥，好彩一班弟子嚟到最後一戰，仍然對佢敬愛有加。恩尼斯達早前接受西班牙《先鋒報》訪問時話，會全力爭奪西班牙盃令哥帥笑住離開，順便彌補自己09年因傷缺席決賽嘅遺憾，老臣子沙維更透過《體育報》以示忠心：「我哋會為佢効力至死！」相信巴塞眾將都希望以呢隻獎盃送別哥帥，等佢重溫4年前首次領軍奪標嘅快樂。
畢爾包決賽輸經驗

小妹唔否認比爾沙帶領嘅畢爾包水平極高，不過呢班充滿活力嘅年輕球星缺乏嘅，正正係應付決賽嘅心理素質，歐霸盃決賽對馬體會嗰陣，一群「小雄獅」就因為太緊張招致大敗。雖然當時喊到變豬頭嘅蒙尼恩豪言今仗要同巴塞鬥爭控球權，不過同「地上最強」踢埋同一路波，呢班小將分分鐘變成搶波馬騮！
巴塞防守3將缺陣

由於佩奧爾、艾比度同丹尼爾全部缺陣，巴塞今場已經決意要以攻代守，用最強火力轟散畢爾包防線，「小白」亦都唔敢輕敵，更代隊友宣示決心：「進攻一向係我哋嘅風格，不過嚟到最後一戰，仲要面對畢爾包，就一定唔可以畀佢哋搶到控球！」單憑呢種鬥志，佢哋想數多幾球幫哥帥拎住14項錦標光榮離隊，又點會有問題先？
橫數千軍

畢爾包5戰不勝冇入波

‧近5仗全部不勝兼未能取得入球，其中3場遭攻入3球。

‧雖已取得歐霸盃外圍賽資格，若捧西盃將直接進入分組賽。

巴塞連開6場大

‧為西班牙盃史上奪冠次數最多球會，共25次捧盃。

‧近6場得3勝2和1負，全部開大。
近5屆決賽戰果

年份 冠軍 亞軍

2011 皇家馬德里 0:0（加時1:0） 巴塞隆拿

2010 西維爾 2:0 馬德里體育會

2009 巴塞隆拿 4:1 畢爾包

2008 華倫西亞 3:1 基達菲

2007 西維爾 1:0 基達菲
賽制：

決賽於中立場馬體會嘅卡達朗球場舉行，1場分勝負，若90分鐘打和將加時30分鐘，再和則互射12碼決勝。