墨西哥Hea鬥威爾斯敲和

猪拉多纳

威爾斯喺前領隊史必離世後，改由高文掌管，不過呢位新帥今晚領軍造訪墨西哥踢熱身賽，想贏波響頭炮頗有難度，皆因一班主力見冇嘢好爭紛紛退隊，好難贏到有「小豌豆」及杜斯山度士壓陣嘅墨西哥，好彩後者亦只係踢風流波，小妹今場一於扒冷敲4.4倍和啦！（開賽時間：周一凌晨3:00）

威爾斯國家隊喺史必帶領下穩步上揚，加里夫巴利同艾朗藍斯等年輕球星湧現，亦令國民寄予厚望，力爭殺入2014年世盃決賽周，無奈史必突然離世，令一切又要由頭建立。
威爾斯新帥登場唔齊腳

今場係高文接手後首次領軍，本來守將艾殊利威廉斯寄望球隊離開國土比賽可以抖抖氣，忘記過去重新出發。點知一班隊友就唔多合作，除咗加里夫巴利因傷退隊，禾漢、列特利及達斯比歷克等主力亦未能應戰，無論前線定後防實力都大為削弱，得番比拿美一個獨力難支，高文想喺處子戰贏波唔容易。

對手墨西哥班人最出名嘅，當然係查維亞靴南迪斯，拍檔杜斯山度士曝光率雖然冇咁高，但喺國家隊表現向來唔錯，有力爭士哥。不過費格遜一早向「小豌豆」落咗「柯打」，要佢留力曼聯嘅季前備戰，今場未必會搏命，都係敲和比較穩陣。