捷克過氣射手火力細

猪拉多纳

歐國盃臨近，各支參賽球隊都積極踢熱身賽練兵，其中捷克今晚於主場出戰匈牙利，他們梗係想贏波壯行色，但仍要倚靠過氣射手巴路士數胡，實在信唔過，寧捧入球細。（周六凌晨1時開賽）

自比歷克上任後，捷克以國內雄師柏辛域陀尼亞為班底重建球隊，並開始注重防守。不過，捷克依家面對攻力疲弱的問題，以致比帥仍要對前屆歐國盃神射手巴路士委以重任，此子早已過咗巔峰期，側面睇該隊依然青黃不接。
匈牙利作客守得

另外，中場主力路斯基有傷在身，今仗未必可披甲，事實上他仍是捷克組織進攻的源頭，冇咗佢會令該隊的攻力大打折扣。匈牙利防守唔錯，近三作客僅失兩球，捷克未必佔到甜頭，既然一隊冇攻力，一隊守得，入球細可謂水到渠成。

至於歐國盃東道主之一的烏克蘭攻力回升，勢與奧地利合演入球騷。葡萄牙U21嗜攻，一定唔赦俄羅斯U21，捧大最好。

（有線155台周六凌晨4時直播）