蘇狄雄又勝霍廐馬

猪拉多纳

蘇狄雄上次日賽幫霍利時爆冷贏隻「戰士」，擒日騎練合作擦出更多火花，今季屢熱屢敗嘅「怡情養勝」，終於響擒日第二場嘅五班賽事敲響勝鼓，贏馬加分後，呢匹馬正式逃離淘汰邊緣，下季繼續同大家見面。
       
怡情養勝後上逢馬過馬。
霍利時連贏四日

霍利時近期戰績大反彈，贏馬捧盃樣樣有，連埋擒日贏隻「怡情養勝」，已經連贏四個賽馬日，對於今場頭馬，練者表示相當期待，因為呢匹南非馬，係由佢親自入貨，今場溫拿多少有啲為名而戰，其實呢匹馬，今季表現循序漸進，不過後上跑法就好被動，霍利時賽後講過，杜利萊曾經畀呢匹馬嘅評價，就係最好響快步速嘅千四米賽事發揮，結果今場形勢就配合到天衣無縫。不過呢場久候嘅頭馬，怡和團體大部分成員因為唔得閒入場，白白錯過拉頭馬機會，但成員之一嘅高鑑泉，自己貴為港大校友，能夠響擒日港大校友會盃賽事日贏馬，都可以講夠晒應景。