科羅拉多齊腳唔驚肯薩斯

猪拉多纳

近排世界各國都進行熱身賽，但美職盃聽朝卻爆發16強大戰，搞到肯薩斯體育會就冇咁兩件國腳級主力，佢哋喺主場對住科羅拉多急流唔見太大優勢，2.1倍「讓球客勝」捧得過！（開賽時間：周三早上8:30）
肯薩斯兩件主力踢太公波

肯薩斯體育會早前主場以2:1擊敗聖荷西地震，終止4場不勝走勢，不過主力基卡馬拉同中場羅渣艾斯賓路沙踢完嗰場後，已即時返國家隊報到，備戰世界盃外圍賽，結果肯薩斯喺上周中嘅美聯盃第3圈，主場僅以3:2踢走低組別球隊奧蘭多城，可見冇咗佢哋有幾大鑊，最慘係後衞希迪克啱啱仲重傷抖4個月，就算肯薩斯今場將最平波飛減至13美元、持季票球迷更可免費入場幫手打氣，亦幫唔到幾多。

對手科羅拉多急流踢美聯盃都幾認真，上輪作客低組別球隊譚柏灣暴徒，仍用盡5名非美籍球員嘅名額，最終亦輕取3:1，考慮到佢哋目前冇球員要應付太公波，預計今仗陣容相當完整，應該可以坐和望贏。
美聯盃賽制：

今輪為16強賽事，以一場過分勝負，若法定時間內打成平手，則需加時作賽，再和則互射12碼決勝。