荷蘭捧場客做大戶點心

猪拉多纳

荷蘭爆冷輸畀丹麥搞到一地眼鏡碎，不過，大戶晨早計到呢個戰果，開波當日一早重插丹麥，搞到莊家轉盤，由受讓一球變成半一，丹麥走地領先一比○再受讓半一，班大鱷繼續掃貨，結果真係頂到完場贏埋，認真犀利！

喺荷蘭落後嗰陣，散客瞌埋眼捧荷蘭，但明顯忽略咗戰況，丹麥團隊精神好，領先後專心防守，前面又停到波，結果班散戶最後變晒大鱷點心。嚟到歐國盃決賽周，已經冇乜強弱之分，以後遇到呢類情況，要小心觀察環境，睇唔通就咪立亂追喇！

同日尾場德國大戰葡萄牙，大戶開波前追葡萄牙，走地見到勢色唔對賭細盤，埋單計數冇乜損傷，呢啲就係專業同業餘最大分野，人哋贏就贏到盡，輸就輸少少，唔少莊家怕咗班大戶，一見到佢哋搏殺都跟埋一份，以免搞到損手爛腳，真係冇晒乎。
法英戰吼細盤

講番今次推介，英法大戰初盤平手，兩隊水位接近，隨住英軍陸續傳出不利消息，法國畀人打到變平手低水，甚至有莊家轉盤要讓平半，呢場兩隊差距唔大，有啲和味，正路平手要法國，讓波就睇英格蘭，但都係唔穩陣，左度右度，玩入球細最好。

另外，今屆烏克蘭真係曳，瑞典有得受讓好著數，瑞典似足丹麥咁硬淨，呢類北歐波全部都實而不華，今次先o趙烏克蘭，遲吓對住英格蘭同法國都有得打o架。
肥叔心水

法國 細

瑞典 下盤