烏克蘭核彈爆發有驚喜

猪拉多纳

經過前晚Ｄ組比賽，決賽周十六支參賽球隊全部亮相，英格蘭一如所料踢回簡單足球，領隊鶴臣棄用花拳繡腿嘅禾確特、寧選經驗欠奉但活力十足嘅阿歷士張伯倫，以效率及實用足球成功抵擋法國來襲。法國演出不過不失，勝在四平八穩，首仗和波對雙方都冇蝕底，出線機會依然均等，反而值得一提係同組主辦國烏克蘭成功製造驚喜，憑老將舒夫真高精湛演出，二比一反勝瑞典打響頭炮，照目前形勢及士氣，烏克蘭反而係出線最樂觀一隊。
丹麥唔赦葡萄牙

談回今晚死亡Ｂ組賽事，個人認為兩場都有和味，至於有冇菠菜價值就讓大家自行判斷。先講頭場丹麥對葡萄牙，丹麥領隊摩頓奧臣向來有料，雖然手執一班並非一線球員，但踢法整體兼紀律性強。葡萄牙前場單靠Ｃ朗及拿尼，正所謂「雙天難保至尊」，丹麥有力立於不敗之地。

尾場荷蘭對德國，荷蘭首仗全失三分，只怪陣中前線球員腳頭無靈，其中拜仁翼鋒洛賓於季尾聯賽、歐聯接連失機，明顯仍陷信心危機。這些高手過招場合，埋門把握力差屬於兵家大忌，荷蘭未能擺脫「洛賓錯失機會後遺症」，要贏德國唔係咁容易。