為撐英格蘭望希臘晉級

猪拉多纳

歐國盃簡直係全港大部分人熱講話題，唔單止喺公司嘅時候會有人同我講波、傾波衫，連朋友聚會話題都係講歐國盃。前日同一班朋友飯聚，以往一坐低先會互問近況，但今次一嚟大家就問： 你捧個隊出咗局未呀？

以往好少睇波，亦冇留意身邊朋友原來個個都係波牛加超級球迷，佢哋話咁啱喺《東方日報》睇到我有份寫專欄先知我都睇波，我話其實我係今屆先開始咁留意，以往真係好少睇。佢哋話以我波齡咁淺，上次估8強隊伍都算Ok，都係o架，8強我估中咗5強，不過俄羅斯出咗局，我都有少少唔開心，惟有全力撐英格蘭啦！

8強戰今晚就打第二場德國對希臘，我都有估德國晉級！朋友話德國氣勢如虹，佢哋係分組賽唯一全勝之師，仲睇好已經有三球在手嘅馬里奧高美斯攞今屆神射手，講到佢哋咁勁，我就想希臘喺呢場贏波（雖然佢轟咗俄羅斯出局） 。梗係啦！今場邊隊晉級，下場就會對英格蘭同意大利嘅勝方，假如希臘可以出到線，英格蘭進入決賽嘅機會好似會大啲喎！