英意Bad Boy隨時劈天光

猪拉多纳

歐洲國家盃八強壓軸戰由英格蘭決戰意大利，兩大壞孩子朗尼同巴洛迪利將英超戰場帶到落決賽周。英軍老帥鶴臣講明唔介意醜陋地贏波，將繼續用穩守突擊戰術，大踢「車路士式」悶蛋足球。意軍今屆經常虎頭蛇尾，為免再喺尾段莫氣，今次早段唔會谷得太盡，預期雙方半場冇交收，要「半場和」！（now 632及660周一凌晨2時45分直播）
英格蘭鬥狗上身

英格蘭分組賽三戰兩勝一和首名晉級，當中並冇乜邊場踢得輕鬆，最後一輪對住烏克蘭即使有朗尼復出仍然要捱打，連搓腳波都唔多掂，悶戰連連，令唔少捱夜睇波嘅朋友叫苦連天。如果你唔係死忠「英粉」，又唔係有心賭球，今次捱夜前要有踢埋加時同射十二碼嘅心理準備，唔好妄想英軍突然變招大踢進攻足球，佢哋依家最叻係守，鶴臣講明最緊要交到成績，唔怕悶親球迷。

隨住朗尼停賽期滿復出，英格蘭中前場齊晒腳，但控球在腳組織攻勢並非佢哋強項，正如守將A高所講，英軍最強之處係鬥志一流，有如十一條鬥狗喺場上無間奔走力逼對手，隊長謝拉特場場忘命瞓身助攻助守，個個大牌球星齊齊放下身段落手落腳做「髒活」，踢來甚具車路士feel！今戰快翼艾舒利楊格傷勢無礙齊腳出擊，大軍會先穩住後防，再謀定而後動。
意大利虎頭蛇尾

意大利以往傾向主守，但喺柏蘭迪利領軍下踢得頗為悅目，老將派路喺中場踢到上晒身，傳射都掂，非常sharp醒。不過，意軍喺分組賽有個弊病，佢哋往往只得半場好波，三戰同樣先開紀錄，當中兩場被追和，尾段仲成日踢到走晒樣，據意大利專家巨高指出，意軍射手卡斯辛奴病愈冇耐，工作效率麻麻，只能喺前線等待機會，隊友要走埋佢嗰份，踢少半個自然易莫氣。
五五波預咗加時

英格蘭同意大利都唔係奪標熱門，今戰均無贏波把握，莊家開平手盤，仲將細盤賠率壓低至不足1.4倍，反映呢場係悶戰。意大利防線重心基亞連尼受傷缺陣，中場莫達有傷上陣成疑，人腳唔齊，將會盡量做好防守減少出錯，唔排除兩隊要踢埋加時兼射埋十二碼先分到勝負，上半場好有機會交白卷，半場細冇肉食，玩「半場和」更佳。
英格蘭

★艾舒利楊格、阿歷士張伯倫、占士米拿、艾殊利高爾、謝拉特均有黃牌在身

★上場分組賽對烏克蘭，英軍上半場做出零次中框射門

★朗尼上仗對烏克蘭取得其代表國家隊的第29個士哥，亦是他自2004年歐國盃後，首個大賽決賽周入波

★艾殊利高爾上仗對烏克蘭，完成個人第97次為國效命，這仗亦是他第21次於歐國盃及世界盃決賽周上陣，壓倒碧咸及施路頓，成為替英軍出戰大賽場數最多的球員
意大利

★馬治奧、基亞連尼、巴洛迪利、邦路斯、莫達、蒙杜利禾、保方、巴沙列堤、迪羅斯均有黃牌在身

★派路對克羅地亞的直接自由球入波，是自04年捷克中場馬歷軒斯對德國的「一腳波」罰球破網後，歐國盃決賽周首個直接自由球入波

★今屆分組賽對西班牙之役，是前鋒迪拿達利自南非世界盃對斯洛伐克後，兩年來首次替意軍披甲，恰巧地呢兩場波他都有入波

★由現任主帥柏蘭迪利領軍後，唔計熱身賽，意軍於正式比賽至今仍保持不敗，並取得9勝4和的成績