日耳曼軍團最佳學習素材

猪拉多纳

Peter係一個球癡，幾廿歲人睇咗咁多年波，其實冇話邊隊特別鍾意，只要球隊能踢出神奇頂級超卓嘅足球，Peter就會欣賞佢哋。近十年八年我就欣賞西班牙，喺今屆歐洲國家盃，Peter最欣賞就係德國。其實早於分組已睇好德國，佢哋演出果然冇令人失望，呢支德國隊可謂睇落舒服，嗒落有味。Peter覺得睇德國比賽仲好過上十堂教練班，因為佢哋行緊當今世上最先進嘅足球戰術及理念。德國肯定係今屆奪標頂頭熱門，佢哋唔會輸畀任何一支球隊，就算輸都只會係輸自己。

德國球員有三個強項，第一係well-coach、其次為passing、第三就係fitness。每當睇到德國比賽，你都可以清晰見到球隊嘅陣式，好少有球員走甩位甚至走錯位。要做到呢一要點，除咗話德國領隊勒夫有料到之外，仲要球員有紀律兼服從性。當隊形建立後，球員就利用傳球去製造入球機會。Peter經常強調傳送係足球至高境界，德國當然做得到。更加可怕係德國球員身體質素好，唔單止教練團隊谷到個個球員都咁弗，球員本身亦有高大身形 及充沛體力，埋身肉搏梗係比對手優勝。
英意交手和味濃

睇番德國對希臘，德國行軍速度快過希臘幾倍，就算領隊收起馬里奧高美斯、湯馬士梅拿及普多斯基都冇問題。依家德國真係瓣瓣有，好難有球隊可以贏佢。至於今晚英格蘭對意大利，Peter覺得兩隊都唔想輸第一球，踢落一定會好謹慎，和波味相當濃郁。
金句：德國機動得來亦具創造力