蒙特利爾陷低潮益晒肯薩斯

猪拉多纳

美職係其中一個過氣球星養老熱點，蒙特利爾衝擊繼早前羅致得老牌射手迪華奧後，周一又向前意大利國腳尼斯達開出合約，相信都好快成事，不過歷年來大搞得嘅美職球會，好似銀河同紅牛都要經歷一段調整期，點都唔信蒙特利爾短期內會有作為。

蒙特利爾本來季初都好地地，點知迪華奧6月報到後，隊波就好似被落咒一樣，火力冇提升之餘，更連續兩場輸0:3，近4戰夾埋仲失咗10球，聽朝佢哋喺主場迎戰比佢哋多一日休息時間嘅肯薩斯體育會，平手盤梗係撐客軍。

（開賽時間：周四早上7:00）
銀河費城聯開大騷

至於洛杉磯銀河對費城聯嘅美職尾場大戰，銀河自從有羅比堅比歸隊之後，近3戰都有3球進帳，火力夠晒勁，對住連續3場開大嘅費城聯，1.82倍入球大係首選。

（開賽時間：周四早上10:30）

足球重心：肯薩斯體育會（平手）、洛杉磯銀河（入球大）

馬膽推介：7場(6) 綠色好

與新興短途勢力「善寶」互有勝負，實力唔使懷疑，跑法機動兼排得3檔，形勢比起排外檔嘅熱門「禮尚往來」有利得多。