華斯高乘勇打殘山度士

猪拉多纳

雖然係周六，但今日賽事唔多，阿king集中同大家講巴甲，其中華斯高主場對山度士，後者有王牌前鋒尼馬缺陣，面對位列次席嘅華斯高，想贏都有心無力，主勝實食冇黐牙。

（周日清晨5時30分開賽，馬會網上文字直播）

自從喺自由盃出局後，山度士亦的起心肝重新專注番聯賽，並擺脫季初頹勢，爬番上中游位置。不過仔細一睇，其實該隊勝率唔高，儘管於巴甲已保持五場不敗，但僅得一勝，其餘四場全部打和，實在不宜高估。
明尼路惡客圖「利」

更重要係山度士嘅「未來球王」尼馬，同埋中場大腦甘素已飛抵倫敦，為巴西備戰奧運，今仗無緣為該隊披甲。眾所周知，尼馬係山度士取分之匙，冇佢壓陣等於令該隊自斷半臂，唔識入波。相反，次席華斯高狀態大勇，老將祖連奴比南布肯奴、阿歷辛度、迪亞高蘇沙入球停不了，加上今季主場五戰四勝，呢場食硬「冇牙老虎」山度士。

另外，利斯菲體育會升班後表現唔算標青，對住作客嘅榜首球隊明尼路，主場出擊都信唔過，捧對家為妙。至於哥連泰斯已重上正軌，要贏作客勁曳的波圖基沙冇難度，「讓球主勝」捧得過。