熱身賽照攻娛樂觀眾

猪拉多纳

歐洲主流聯賽仲有幾個禮拜先開波，好彩近排有啲熱身賽同埋奧運足球解吓悶！聽朝晨咁早喺費城有場美職明星隊對車路士嘅熱身賽，備戰之餘當然要娛樂觀眾，小妹撐佢哋夾手夾腳做番場入球騷，1.4倍「入球大」可作過關膽。（now632台周四早上8:30直播）
新兵夏薩特有貨交

小妹睇咗美職明星隊嘅名單後，最意外嘅都係羅比堅尼落選，好彩其他美職巨星，包括亨利、碧咸同當路雲都喺名單之上，雖然「咸哥」喺倫敦準備緊奧運開幕式，球迷有冇機會喺呢場比賽一睹「萬人迷」風采，都仲係未知之數，不過一班美職球員啱啱踢到季中，狀態一定唔成問題，而且目前喺射手榜領先嘅雲度路斯基都會上陣，要取得「士哥」一啲都唔難。

講明係熱身賽，都好難旨意車路士排出強陣應戰，不過新收購嘅夏薩特上場演出極具水準，有佢同盧卡古、林柏特等撐場，就算桑馬達去咗踢奧運，都絕對唔影響前線火力，要同美職明星隊做番場「大」騷又有咩難度？