賓菲加皇馬大演合家歡

猪拉多纳

雖然大家近期焦點會集中喺倫奧，但四大聯賽球隊已為新球季開鑼積極備戰，其中西甲班霸皇家馬德里將赴葡萄牙，同賓菲加爭逐「尤西比奧盃」。兩軍私交甚篤，皇馬寓賽於操，志在合演一場好波娛樂觀眾，呢種缺乏競賽性質嘅「合家歡」場合，要捧大盤。（now 632周六凌晨2時直播）

今場熱身賽名為「尤西比奧盃」，實則只係一場熱身賽，不過兩軍近年關係密切，在著名經理人文迪斯不斷牽線下，賓菲加漸漸變成皇馬嘅「衞星球隊」。例如高價將迪馬利亞同法比奧干查奧售予皇馬，令賓菲加大賺一筆，當皇馬打算清除「冗員」時，賓軍便成為第一收容所，該隊已平價接收咗沙維奧拿、查維加西亞、加雷等棄將，可謂互惠互利。
皇馬C朗未歸隊

對於皇馬教頭莫連奴嚟講，呢場波志在操起狀態，但賓菲加話晒主場出擊，點都想捧番個盃仔造勢，而一眾皇馬棄將都想喺舊東家面前攞威，其中守將加雷更傳出受到巴塞垂青，為了跳槽實搏盡，加上雙方嘅關係，皇馬點都要畀面主人家，賓菲加會稍為秤先少少。

皇馬今場後防不整，多名主力如C朗仍未歸隊，馬些路又要踢倫奧，而放售在即嘅老將卡維奴未有隨隊，惟有用多名新仔頂檔，不過前線如迪馬利亞、希古恩逐漸上力。預計雙方會放開懷抱積極進攻，喺呢啲場合，與其估邊隊會贏，不如捧入球大好過。