日本「瀛仔」突擊摩洛哥

猪拉多纳

奧運男足開鑼日爆冷連場，其中Ｄ組日本擊敗大熱門西班牙最為轟動。今日兩軍分途出擊，日本keep住上仗韌勁，出戰摩洛哥實食冇黐牙；西班牙要出線今仗冇得再輸，破釜沉舟下隨時大炒洪都拉斯，為球迷奉獻一場精彩入球騷。

先講亞洲「瀛仔」，上仗打低西班牙表現出色，主動讓出控球權引對方谷前，之後頻頻打反擊，呢招收到奇效，如果唔係永井謙佑及清武弘嗣把握力欠佳，人多打人少嘅日本至少可贏五粒。經過「格拉斯哥奇迹」後，日本球員信心爆棚，今場對手摩洛哥踢法重攻輕守，空有控球優勢卻腳頭無靈，正中日本下懷，繼續打快速突擊，相信摩軍會顧此失彼，主勝穩陣。

（有線18台周一凌晨零時直播）
西班牙勢炒洪都拉斯

至於「受傷狂牛」西班牙，上仗初段踢得太淡定，失波後陣腳大亂，連累守將恩尼高馬天尼斯犯規領紅，打少個更加無力回天。不過，南非世盃時「狂牛」班大國腳都係出師不利，最後咪奪標而回。由於出線形勢嚴峻，呢場波西班牙必須盡量大炒對手，爭取得失球優勢，只要領隊路爾斯米拿調節好球員心理，以桑馬達、阿祖安盧比斯同蒙尼恩級數，要數洪都拉斯可謂毫無難度，大盤及「讓球主勝」值得捧場。（有線18台周一凌晨２時45分直播）