小狂牛發惡撞散洪都拉斯

猪拉多纳

喺奧運男足D組首戰落筆打三更嘅奪標熱門西班牙，今晚喺英國紐卡斯爾火併洪都拉斯，幾乎係許勝不許和局面，否則爭出線形勢即會陷入危機之中。吸收過上場輸波教訓，壓力亦同時大減，「小狂牛兵團」係時候見真章，加上主力前鋒蒙尼恩傷愈，唔難大勝一場，1.6倍「讓球主勝」值得捧場！（有線18周一凌晨2:45直播）

目前0分排喺D組榜末嘅西班牙男奧足，如果今晚再唔贏波，出線形勢會相當被動。始終佢哋人腳唔曳，今晚想攞3分絕對唔算貪心。事實上，上仗佢哋不敵日本同輕敵有相當大關係，隊波個個當正自己都係歐洲冠軍，由後防開始就過分「歎慢板」搓波，搞到經常被逼甩，防線險象環生，不過吸取完上次教訓，經常踢高章波嘅恩尼高馬天尼斯又坐波監之下，以曼聯門神迪基亞領導嘅防線應該會打醒十二分精神，踢番場好波。
新星蒙尼恩傷愈

中前場方面，領隊路爾斯米拿上場後半段先後換入奧里奧爾羅美奧、基斯甸泰路同安達靴里拉後，進攻組織總算有多少改善，球員有番啲信心。最緊要係畢爾包新星蒙尼恩嘅腳傷已經接近痊愈，今晚有望復出披甲，前線變化將會大增。仲有一點，係「小狂牛兵團」首戰輸波後，其實西班牙本土都冇乜人睇好佢哋可以摘金，壓力大減，隨時可以踢番出水準。
洪都拉斯防線不穩

洪都拉斯呢邊，上仗同摩洛哥踢成各二平手，進攻發揮唔錯，不過失2球則令人擔心佢哋防線實力。查實以英超兵美羅費古羅亞領導嘅洪軍防線，近5戰4場有失波，一向唔算穩陣，想佢哋好似日本靠防守紀律搞掂西班牙，睇怕都唔使旨意，一旦玩對攻，隨時輸鋪大大鑊添！

男奧足D組