北韓今非昔比「美女」大炒格

猪拉多纳

奧運女足今晚進行分組賽最後一輪，其中喺G組2戰全勝提早出線嘅美國女足，對住北韓咪以為佢哋會揸流攤，事關一來佢哋要搶分確保首名，二來由門將蘇露引發嘅twitter風波，亦急需贏波顯示團結兼振奮軍心。對手北韓上仗慘敗法國腳下，證明實力今非昔比，美國讓波出擊，1.9倍「讓球主勝」信得過。（有線63及203周三凌晨0:15直播）
雲芭芝被打FIFA表態徹查

反勝法國再大炒哥倫比亞，被視為今屆奪金大熱嘅美女兵團實力有幾勁，都毋須力奇多講。上仗擊敗哥倫比亞慘被對手打瘀右眼嘅副隊長雲芭芝，投訴終獲國際足協受理表態會徹查，絕對有助提升士氣。至於蘇露喺twitter鬧前輩姬絲汀，事後雖然畀領隊皮婭「照肺」，但後者都話明唔會處分蘇露，由佢繼續把守最後一關，後防定過抬油啦！

北韓女足雖然係亞洲頂級球隊，但喺奧運素來成績麻麻。小組首戰對哥倫比亞受到放錯國旗風波影響嘅佢哋，上仗對住法國嚴重失準，狂吞5蛋，球員信心勢必大受打擊，今仗對住火力強勁嘅美國，輸2球應該係最低消費啦！