「沙廠」行運唔係「人」咁品

猪拉多纳

今日場阿甲沙蘭迪兵工廠主場對小阿根廷人，運氣會決定一切，首先阿根廷呢排天氣差，唔少波臨時改期，買咗呢場波會唔會退款白玩一場睇個天，至於講到勝負，行緊運嘅兵工廠亦應該有條件小勝。（開賽時間：周二凌晨4:10）
小阿根廷人射手重創Down晒

運氣呢樣嘢本來冇得捉摸，但係上季阿甲冠軍沙蘭迪兵工廠的確有啲死運，開季1勝1和未輸過，不過落袋嗰4分，嚴格嚟講都唔係靠自己攞到，揭幕戰主場贏聖達菲聯1:0場波，贏嗰球多得對家擺烏龍，第二場波作客拉費爾拿踢得順咗，弊在入唔到波0:0摸和，即係話呢隊不敗之師今季仲未入過波，冇波入都執到4分，仲唔係行緊運？

對面隊小阿根廷人就濕滯嘞，阿甲開咧兩戰輸晒，齋失5球冇波入，至慘係上場輸畀競賽會嗰陣，秘魯前鋒荷西費南迪斯唔知係咪撞鬼，爭位頂波畀人撞跌拗柴，左腳足踝就咁斷咗，明顯睇到個骹位歪晒凸咗出嚟，勁核突，小阿根廷人個主帥艾斯查達都認當時場面得人驚，話搞到佢隊人Down晒喎。

大家都未入過波，成績就差天共地，證明呢期兵工廠好運過小阿根廷人好多，而且主隊近3次响自己地頭都食住對手，取得2勝1和，個1.82倍主W抵博嘅。