馬拉加星散讓波唔抵玩

猪拉多纳

西甲嘅馬拉加今晚喺主場上演歐聯處子戰，於附加賽首回合迎戰希臘球隊彭拿典奈高斯，主隊今季因財困面臨星散，陣容單薄難以分心歐洲賽，加上行政極度混亂搞到人心惶惶，不妨博2.3倍「讓球客勝」。（有線64及204周四凌晨2:45直播）
彭拿典奈高斯主帥倒戈

今次係馬拉加史上首次出戰歐聯，本來應該雄心壯志，點知中東老闆突然閂水喉，搞到要賣星還債，冇咗辛迪卡索拉同荷西朗頓呢班主將後實力大減，上場聯賽對住新升班嘅切爾達，竟然要靠16歲嘅奧連加後備建功先勉強贏到！不過管理層竟然懵吓懵吓，唔記得幫呢位剛打破西甲最年輕入球紀錄嘅新星搞簽證續期，搞到佢要用短期學生簽證嚟「吊命」，可見隊波真係亂七八糟。

彭拿典奈高斯嘅教練謝素度費拉拿曾經喺2010年中教過馬拉加5個月，但隨後就畀比歷連尼搶飯碗，今次領軍倒戈，有力靠喺第3圈外圍賽各入2球嘅馬夫利亞斯同基斯杜度洛普路斯「復仇」！