曼聯鐵三角今晚見真章

猪拉多纳

「老虎唔發威當病貓！」首輪英超壓軸愛華頓主場爆冷砌低曼聯，費格遜低調對應外界冷嘲熱諷，專心重整軍容，有冇料到睇今晚對富咸就知！
富咸忽龍忽蟲見慣晒

畀「拖肥糖」打窒條氣，試問老費點啃得落，但係佢老人家跑慣江湖，輕描淡寫就將呢場敗仗忘記得一乾二淨，然後簽埋荷蘭守將畢拿，周圍Sell貝碧托夫，事事親力親為，魄力驚人。雖然頭炮打唔響，但曼聯表現唔差，贏形勢輸波，主要係因為尹佩斯、香川真司同朗尼呢個鐵三角組合未夾熟，經過幾日操練，加上奧脫福懾人氣勢，難怪眾「魔躉」均對今戰充滿期待。

富咸大炒諾域治同屬冷門戰果，冇錯，富咸喺自己地頭踢出應有水準，但諾域治明顯冇態，失第一球後放軟手腳，先至合演「大炒好戲」，始終富咸喺英超經常性大上大落，作客曼聯分分鐘掉轉角色呢！