藍黑軍「廠」天下 阿仙奴發奮屠「城」

猪拉多纳

阿仙奴喺開咧戰同新特蘭悶和0:0，相信令唔少朋友失望，Yennie有朋友係兵工廠躉，更加用接受唔到嚟形容添。但阿仙奴畢竟係勁旅，領隊雲格亦係有料之人，應該唔會連續兩場失威啩？今晚阿仙奴作客史篤城，就算主隊喺地頭戰績彪炳，Yennie都撐「小兵」旗開得勝。

（有線200及300周日晚8:30直播）
《一年走一個隊長》更要堅強

歌仔都有得唱，阿仙奴《一年走一個隊長》（網友改編自《一人有一個夢想》），今季繼續有主力尹佩斯同桑治離隊，好在雲格季前羅致咗蒙彼利埃射手基奧特同科隆前鋒普多斯基，照計應該保持到鋒力。上仗「小兵」受到尹佩斯離隊首戰嘅壓力影響，搞到眾將發揮一般，普多斯基等新兵先會冇貨交，經過熱身後，今場會見真章喇啩？或者經過一段日子接受咗「隊長」離隊會堅強啲、作客壓力又細啲，一班「廠仔」會踢得好啲呢！

靠「手榴彈」戰術搵食嘅史篤城，呢兩季都排喺中游，陣中高治、堅韋尼鍾斯、厄遜、梳爾哥斯同賀夫幾碌大杉，令班波嘅高空攻勢成為「必殺技」。不過睇番對賽往績，阿仙奴就明顯佔優喇，而且首場和波失分，雲格已經面對嚟自四方八面嘅批評，今場如果再行差踏錯就大件事喇，鬥志唔使懷疑，一於信多阿仙奴一次，博佢哋作客贏波。
微博傳情：好「黑」呀>.<

我由頭黑到落腳呀！我唔係講緊運氣，而係膚色！我上星期去泰國進行拍攝工作，每日都長時間喺戶外，結果曬到成身黑忟忟咁！雖然我每日都由朝影到晚，加上舟車勞頓，係幾辛苦，不過今次工作學咗好多嘢，幾辛苦都值得！哈，我仲趁收工後去咗拜四面佛，祈求《太陽波經》嘅讀者今季贏多啲添！