「雙斯」拍住羅拔仔 蜂狂掃紐

猪拉多纳

衞冕德甲冠軍嘅多蒙特今晚作客紐倫堡，進入「後香川時代」嘅「蜜蜂兵團」仍需時間適應，作客未必可以輕鬆獲勝，好彩有回巢嘅馬高列奧斯同馬里奧葛斯拍住上，火力依然有番咁上下，加上紐倫堡亦有強援加盟，球迷絕對可以疊埋心水睇番場入球騷，一於力捧1.68倍入球大啦！（有線61及64周六晚9:30直播）

無可否認，多蒙特缺少咗香川真司，上場對雲達不來梅踢起上嚟有啲患得患失，但唔好忘記佢哋上季失去紐尼沙軒後，都經歷過6戰得1勝嘅低迷時期，最後咪又成功奪冠，所以小妹仍然睇好「蜜蜂兵團」今季繼續做德甲盟主o架！
馬高列奧斯回巢有料到

不過今場嚟到作客環境，小妹始終擔心呢班慢熱嘅蜜蜂仔會重演上季季初嘅低潮，未必可以順利全取3分。但講到入波喎，對多蒙特嚟講就絕對唔係問題，除咗成功留住王牌前鋒羅拔利雲度夫斯基外，回巢嘅青訓產品馬高列奧斯同埋傷愈嘅馬里奧葛斯上場雙雙攞到士哥，夠晒猛火！講真吖，葛斯仔上季缺席唔少賽事，如果可以健健康康，直頭好似多咗個新球員用咁呀！
紐倫堡清武弘嗣夠靈活

「雙斯」年紀輕輕已經備受注目，連德國名宿納薩都話佢哋係「日耳曼軍團」嘅未來棟樑，呢位慕遜加柏名宿更點名稱讚馬高列奧斯：「佢係近代最有潛質同埋最實用嘅球員之一，具備所有成為頂級球員嘅質素！」冇咗香川真司咁又點？有列奧斯就掂晒啦，有佢拍住葛斯仔同埋「羅拔仔」，使乜驚冇波入先？

至於紐倫堡嘅火力亦絕對唔失禮，佢哋今季由大阪櫻花簽入咗以靈活同技術見稱嘅清武弘嗣，加埋嚟自史特加嘅快翼謝赫特，今晚坐鎮主場，實行同多蒙特合演對攻「大」戰啦！

猪拉多纳