樸茨棄盃求生撐般尼茅夫

猪拉多纳

08年足總盃冠軍樸茨茅夫債台高築，嚟緊將面臨被罰扣聯賽積分，加上班波嘅人腳捉襟見肘，係搏都留番啖氣搏聯賽啦，英錦賽呢啲盃仔搏嚟把鬼咩？今晚喺英錦賽首圈對住同級嘅般尼茅夫輸埋唔奇，一於捧2.3倍客W。（開賽時間：周三凌晨2:45）
球員簽短約影響穩定性

家陣淪落英甲嘅樸茨目前受到託管，基於財政問題只允許同新加盟嘅球員簽訂1個月合約，流失咗利姆羅倫斯、華尼同莫高拿等好球員不特止，不斷以短期合約形式簽入新兵頂檔亦影響球隊穩定性，呢個係樸茨新季英甲4戰仲未開齋嘅主因。

亨格比利收到風，前班主錢禮同球迷組織都準備收購樸茨，好有機會喺兩個禮拜內成事，到時賽會就會扣減樸茨10分聯賽積分，護級路肯定難行，不如慳番啖氣集中火力喺英甲搶分好過啦！

對家般尼茅夫開季至今同樣未贏過，不過會方最近就羅致咗列支敦士登國腳級門將貝捷爾，同埋荷蘭名將戴維斯……個表弟羅倫素戴維斯，加埋中場主力哈利艾達刑滿復出，野心十足嘅般尼茅夫明顯秤先，客勝捧得過吖！
英錦賽制

今輪為第1圈賽事，若90分鐘法定時間內打成平手，即互射12碼決勝負。