皇馬想翻身 先要家好月圓

猪拉多纳

皇馬近期成績略有回升，總算跨過小小低谷鬆一口氣。然而內部不和、黨派鬥爭之聲仍不斷籠罩球隊上下，先有「西班牙幫」對「葡萄牙幫」；跟手傳出副隊長沙治奧拉莫斯不滿教頭莫連奴用人唯親；最近更傳出莫帥為獨攬大權，將另一球會幕後要員施丹逼走。其實適逢中秋佳節，最緊要家好月圓，「銀河艦隊」上下和和氣氣，先可以重新翻身，喺聯賽榜上追趕巴塞。
拉科後防失魂嚴重

皇馬今周對拉科呢個對碰喺90年代可謂相當之經典，皆因兩隊當年曾經爭逐過好幾屆西甲冠軍。不過，就算當年正值黃金時期嘅拉科，作客巴拿貝球場都只係贏過一次咁大把，往績已唔見得好，更何況今非昔比嘅拉科，要擊敗「銀河艦隊」又談何容易！再從皇馬對華歷簡奴嗰場比賽睇，賓施馬及C朗拿度都已經搵番入波觸覺，一眾球員嘅比賽態度及爭勝心亦逐漸返晒嚟，如果埋門嗰腳再處理好啲，應可贏得更多。

至於由奧查帶領嘅拉科重返西甲後僅逢一敗，火力唔曳，只係條防線間唔中失魂輸大意波，導致經常喺領先優勢下被逼和衰收尾。始終拉科仲係喺重建階段，乙組比賽水準真係同甲組好唔同，尤其係技術同體能需求上有好大分別，對住信心回升嘅皇馬，睇怕凶多吉少。