馬賽護帥打沉華倫西恩斯

猪拉多纳

巴黎聖日耳門今夏使過億歐元擴軍，自不然成為法甲焦點，但以表現嚟講，馬賽肯定好過PSG多多聲。呢隊「一哥」開季6戰贏晒，以前鋒阿休為首嘅一班手足，賽前仲話要用佳績幫主帥比奧普省靚招牌，造訪近況低沉嘅華倫西恩斯只係小讓平半，上盤當然捧得過。（開賽時間：周日晚8:00）
讚比奧普係戰術大師

比奧普今夏接迪甘斯棒擔任馬賽新帥，昔日執教過南特同圖盧茲嘅佢冇乜豐功偉績，一直畀球迷同傳媒批評未夠班。陣中前鋒阿休同中場華布拿尋日就駁斥批評者唔識貨，除咗大讚比奧普係戰術大師之外，仲希望用聯賽冠軍幫佢老人家平反，鬥志勁旺盛。

最新消息指馬賽射手基格納練波扭親腳，今場大有機會缺陣，不過，阿休兄弟近排輪流入波，所以鋒力唔需要擔心。

對家華倫西恩斯近3場聯賽全部失分，周中法聯盃仲畀法乙嘅摩納哥踢埋出局添，狀態曳成咁邊會係馬賽對手吖！