曉士落柯打搞好防守 扑錘要QPR

猪拉多纳

經過上周六賽事之後，英超未開齋嘅就得番諾域治、雷丁同埋今晚出場嘅昆士柏流浪。QPR早前喺英聯盃反輸畀雷丁出局後，領隊曉士講明想要重返正軌，就先要搞好防守，今晚追月夜喺英超獨腳戲主場迎戰韋斯咸，可望取得聯賽開門紅，主W有2倍值博。

（有線200、300及廣東體育周二凌晨3:00直播）

其實防守唔夠集中係昆士柏流浪（QPR）目前最需要正視嘅問題，除咗之前對諾域治同曼城早早失波外，上場聯賽作客熱刺又係防守出現漏洞，先至喺尾段連失兩球被對手反勝。上周中英聯盃對雷丁又係熱刺嗰場嘅「翻版」，又係先開紀錄嗰隊，最終連失兩球輸波出局，領隊曉士喺賽後都講出重點：「球隊表現其實好好，但明顯我哋喺防守上需要更加嚴密，呢個係重返正軌嘅首要條件。」
韋斯咸作客靠唔住

雖然昆士柏今戰續有守將安頓費迪南同法比奧達施華養傷，不過仲有賴恩尼爾遜等人鎮守防線，問題唔大。至於前鋒森莫亞就曾經効力過今仗嘅對手韋斯咸，熟晒路隨時搵到食。

「錘仔幫」韋斯咸5場聯賽攞到8分算係唔錯，不過近兩場作客就輸畀史雲斯同悶和諾域治，睇得出佢哋作客始終係靠唔住，加上射手安祖卡路爾受傷後，領隊艾拿戴斯進攻路數少咁瓣，冇可能次次都要靠隊長路蘭做救世主，呢場波難阻昆士柏流浪開齋。
歷來對陣唔利客軍

‧昆士柏流浪近6次主場對住韋斯咸取得4勝2和。

‧雙方最近6次對賽，作客一方從未贏過。

‧韋斯咸上季英冠作客成績稱冠，但前年英超降班一季19場作客只贏2場。
昆士柏雙翼齊飛角球大抵博

昆士柏流浪雖然聯賽得2和3負仲未開到齋，之不過佢哋近6次主場對住韋斯咸4勝2和未輸過，相信佢哋今場會靠雙翼胡禮菲臘斯同凱列特兩邊出波，畀柱躉森莫亞狂攻，韋斯咸守將忙住解圍隨時角球不斷，今場一於捧中位數10.5球嘅「角球大」。

猪拉多纳