車仔誓擦丹麥魚腩

猪拉多纳

唔想阿布再o衣o衣哦哦，迪馬堤奧今場就要醒醒定定！上仗歐聯贏唔到，車路士主帥迪馬堤奧畀老細省到立立令，今輪E組作客丹麥弱旅洛斯查蘭特，唔止冇失分理由，仲要贏番鑊甘！洛軍經驗欠奉，仲要冇埋人造草主場之利，捧車仔「讓球客勝」。

（有線63及203台周三凌晨2時45分直播）

車路士被抽到歐聯E組，同祖雲達斯、薩克達、洛斯查蘭特爭兩個小組出線權。首仗車仔主場出擊，於領先兩粒下竟被祖記逼和，賽後老細阿布嬲到震，係咁捉住迪帥照肺。迪帥深知阿布重視歐聯，如今次遇弱贏唔到，後果不堪設想，收到柯打必求大勝。事實上車仔狀態一流，英超剛擊敗阿仙奴士氣高昂，費蘭度托利斯連續兩場有士哥，而「歐聯福星」奧斯卡杜斯山度士隨時候命，加上夏薩特等超班巨星，球隊力足輕鬆打開本屆歐聯勝利之門。
洛軍失人造草威力

洛斯查蘭特被視為本屆魚腩之一，首仗作客薩克達吞兩蛋後，目前奪標賠率為4000倍，屬最大冷門。洛軍人腳曳又缺乏經驗，加上其人造草主場不合規格，今仗將移師哥本哈根帕爾肯球場上演，洛軍失去人造草場之助，就更加惡唔出樣啦！