紅軍發圍捉烏甸

猪拉多纳

畀條選擇題你玩﹕A)當起生猛小將；B)雪到硬無態殘兵，二揀一你會點揀？歐霸盃「死亡A組」重頭戲，利物浦主場鬥烏甸尼斯，紅軍最近湧現大批優質後生仔，如狼似虎好打得，加上「光頭仔」舒維爾復出，面對死氣沉沉、正值內憂外患嘅烏甸，贏得！

（有線61及201台周五凌晨3時05分直播）

俗語話「有危先有機」，正好形容現時利物浦。冇錢買人兼無端借走安祖卡路爾，加上接連出現傷兵，領隊羅渣士冇人可用，逼住起用𡃁仔，點知錯有錯着，效果出奇地好，除史達寧同舒維爾外，連蘇索（前譯蘇素）、韋斯頓、高亞迪斯、艾薩迪都上晒位。佢哋初生之犢不畏虎，肯走肯交肯搏，創造力比正選隊猶有過之。
舒維爾上陣「出火」

歐霸分組賽首仗作客年青人，紅軍踢到曉飛，雖然後防唔太穩陣，但一眾小將於紐尼沙軒帶領下演出奇佳，舒維爾更梅開二度，助紅軍贏五比三。呢個「光頭仔」於英超對曼聯領紅，須停賽三場，今次歐戰可以出場，佢必如猛虎出柙。

意大利球隊對歐霸盃一向興趣不大，以現時烏甸人腳陣容，就算想爭標亦有心無力。球隊季前將兩大主力卡華禾艾沙姆同伊斯拿賣畀祖雲達斯，大大削弱了實力，而前鋒迪拿達利即將三十五歲，速度體力大不如前，早前聯賽對熱拿亞前，更同教練古度連霎氣，今戰未必上陣。事實上，烏甸分組賽首場對安治，就收起貝基治、高達、比斯等幾位主力，起用一班名不見經傳二打六。如利物浦打出正常水準，可全取三分。

好久没做猪