英格蘭－５照捧

猪拉多纳

溫布萊full house等睇入球騷，「三獅兵團」入少粒都被噓爆，力足大炒超級魚腩！世界盃歐洲區H組外圍賽，英格蘭主場迎戰聖馬力諾，「雙特」缺陣反添球隊活力，迪科爾、湯卡華利弗到爆，「Captain R」朗尼擔正做隊長又有老婆懷孕消息沖喜，今場「讓球主客和」英軍「-5」，照捧「讓球主勝」！

（now 633及660周六凌晨3時直播）

有留意開英格蘭嘅朋友，應該都清楚球隊攻力唔算特別強，「三獅兵團」長期依靠穩健防守同列強周旋，於上屆歐國盃更大打「死守足球」，畀各地球評家寸到爆，話佢哋係縮頭烏龜。領隊鶴臣一直並非英軍球迷心水教頭，場場都要出力爭取掌聲，早前作客摩爾多瓦，都要班波由頭攻到尾，最後贏夠5粒，今場仲要主場對世界排名207嘅聖馬力諾，唔贏多過5球唔會收貨。

英軍球迷好耐都未見過愛隊大炒對手，所以今戰表面上戲碼一般，但溫布萊9萬座位竟然晨早賣清光，佢哋想點鶴臣點會唔知？就連威廉王子夫婦之前都到訓練場打氣，為免球隊被噓爆，相信唔會勒住班波唔去。今仗「三獅兵團」有隊長謝拉特同格連莊臣停賽，而林柏特亦因傷缺陣，「雙特」唔喺度對球隊反而係件好事。二人雖有技術經驗，但活力、飢渴感卻不足，今仗畀「生牯仔」湯卡華利、阿歷士張伯倫、占士米拿等擔大旗，後備又有韋碧克、舒維爾等隨時落場搏殺，大炒條件更充足。
聖馬力諾排名低過港澳

聖馬力諾上仗主場鬥黑山都要被炒0比6，於12年歐國盃外圍賽，佢哋作客荷蘭及芬蘭，分別吞11及8蛋。聖軍真係渣到嘔，近3次大賽外圍賽，聖馬力諾32戰全敗，狂失157球僅入3球，現時香港世界排名160，澳門198，聖馬力諾就207，拿仁推介英軍贏到6球，唔過分啩？
英格蘭預計正選陣容

赫特、基斯獲加、菲臘積基爾卡、尼史葛、艾殊利高爾、占士米拿、卡域克、湯卡華利、阿歷士張伯倫、朗尼、迪科爾