德國超班大勝冇「蘭」度

猪拉多纳

「外圍賽之王」德國已經喺各項大賽外圍賽連贏12場，今晚佢哋喺世盃外歐洲區C組作客都柏林出併愛爾蘭，趁住主隊傷兵滿營，加上重心告別國家隊，實力超幾班下，要開個2.02倍「讓球客勝」應該易如反掌。

（開賽時間：周六凌晨2:45）
愛爾蘭撞正傷兵潮

雖然話愛爾蘭班波出名爛打，不過今次撞正德國睇怕幾難有運行，事關佢哋自從歐國盃後，老將基雲同杜夫都已經齊齊告別國家隊，更大鑊係佢哋今仗又撞正傷兵潮，包括李察鄧尼、辛列特加、格連韋倫、占士麥堅恩、奇雲杜里都話唔踢得。防線要大執位，搞到要搵過晒高峰期嘅右閘奧沙移入中路，咪盞出醜。最慘係連首席射手羅比堅尼尋晚都話足踝有傷，加入埋十字軍陣營肯定倦勤，今仗睇怕都係凶多吉少。

冇錯，德國已經有33年未喺都柏林贏過愛爾蘭，加埋主隊今鋪又話會轉踢「433」，話要用3個防中嚟防奧斯爾。不過咪話力奇潑佢哋冷水，奧斯爾今季表現麻麻，反而今仗復出嘅「小豬」舒韋恩史迪加先係中場大腦，問你守得邊個先？主隊今鋪臨急變陣隨時變出禍，就算德國防線今鋪有曉姆斯養傷同拿姆停賽，單靠前面強大火力都夠殺有餘，要大勝話咁易啦！

世盃外歐洲區C組