清泉迪比亞路人間有情 寧踢澳職唔去利物浦

猪拉多纳

日前公仔箱民初電視劇散場，男、女主角為了愛情，毅然放棄財富事業，帶住三個子女到山上避世。拿仁老爸嗤之以鼻﹕「咁做啲仔女邊有前途o架？都黐線嘅！」現實世界已經滿布殘酷，充斥不快與沮喪，若連肥皂劇都再沒有童話，大家之後仲點做人？

現實世界利字當頭，大部分人已被洗腦，貧窮的、沒車沒樓的，就是廢柴垃圾；年輕時被灌輸的道德觀念，若非忘個一乾二淨，就是連提也不敢提。

在這年頭飲水思源等同戇居，早年「One Club Man」都被捧上天，但現代球迷點睇謝拉特？「佢一早就應該走啦，喺利物浦嘥晒啲時間，依家唔使旨意攞英超冠軍啦！」羅渣士現時打小組足球，於網上討論區，連紅軍球迷都話「謝老4」阻頭阻勢，破壞球隊組織！

「紅軍死忠」拿仁幾十歲腦筋不夠靈活，心底內仍對「戇居佬」謝拉特感激不盡。而眼見「清泉」迪比亞路，更覺得人間還有情。當要離開祖雲達斯，他寧踢FC悉尼亦不踢利物浦，只因要尊重於「希素慘劇」離世的「斑馬」球迷。
在扭曲世界已絕無僅有

這種情操，在這扭曲的世界已絕無僅有，有錢都買不到；而這種修為，為迪比亞路帶來的心靈滿足，更非「有錢大晒」的現代叻仔叻女所能感受、理解。衷心祝福這位「球壇長青樹」愈踢愈有，在足球晚年盡情散發餘暉。