另類創富坊

猪拉多纳

項目︰半場主客和 推介︰國際米蘭半場勝

國米經過季初不穩之後，近期於意甲同歐霸盃都明顯回勇，已經連贏四場，打出勁旅本色。今輪意甲該隊坐鎮主場迎戰卡坦尼亞，贏波機會高唱入雲，但主W冇肉食，寧吼半場勝。翻查今季「藍黑兵團」戰績攤路，球隊於所有賽事中贏出八場，竟然全部半場已經領先，睇到呢班波唔會慢慢同你hea，一開波就已經踩油，2倍「半場勝」好路。

（周日晚9時開賽）
項目︰第一隊入球 推介︰飛燕諾

今晚荷甲有場強弱懸殊賽事，由飛燕諾作客任人魚肉嘅芬洛，在加斯安奴柏利同恩馬斯帶領下，飛燕諾表現總算回穩。相反芬洛演出大跌Watt，經常先失波下都無力回天，加上近六次對壘中，飛燕諾有五次先拔頭籌，擺明格食格，今仗有力率先打破僵局，第一隊入球「飛」佢莫屬。

（周日晚8時30分開賽）
項目︰半全場 推介︰基達菲和主

今日西甲早場基達菲對利雲特，前者經過兩連勝後，總算止住頹勢。其實以波論波，基達菲確比利雲特稍為秤先，不過墨西哥小將巴拉今仗停賽，冇咗呢位後上殺手，面對作客踢得保守的利雲特，半場未必咬得入，預計射手迪亞高卡斯度要易邊後先發威入波，和主有4.4倍值博。

（now 632周日晚6時直播）
項目︰總入球 推介︰哥登堡3球

瑞典超今晚有場大戰，哥登堡主場鬥AIK蘇納。哥軍本季成績係麻麻，但於主場仍打出水準惡到冇朋友，除開咧時輸過一場外，之後已十二場未輸過。今輪迎戰AIK蘇納，雙方實力接近，但近九次交手八次分出勝負，打和機會不大；而哥軍近三次贏波都係贏2比1，博「3球」啱數。

（周日晚11時30分開賽）
項目︰首名入球 推介︰愛華頓巴尼斯（206）

愛華頓作客昆士柏流浪贏面較高，但缺少爆炸頭費蘭尼喺前面爆破，射手謝拉域實畀人嚴密看管，賠率偏熱唔抵玩。相比之下，「拖肥糖」左閘巴尼斯更值博，呢位英格蘭球星腳頭都幾重，喺左路不時起腳射門，佢仲係隊中死球專家，有份主射十二碼，上場對韋根正正係靠佢射入十二碼扳平，分頭唔錯一試無妨！

（有線300及200台周日晚11時直播）
項目︰半場大細 推介︰漢福斯大

挪超一向都係入波多嘅聯賽，好多時半場已經有兩粒交收，今日睇中漢福斯對史達比克嘅半場大，有2.19倍幾好路。史達比克原則上護級無望，球員冇乜心理包袱，大打性感足球，尤其作客更加係明顯，最近五場作客全部開大，而且半場亦全都開大，今場絕對追得過。

（周一凌晨零時開賽）
項目︰波膽 推介︰紐迪高1:0、2:0

巴甲紐迪高主場鬥波圖基沙，兩支同屬主場搵食球隊，波圖基沙近11場主場僅1敗，紐迪高近9場贏8場仲犀利，紐迪高今次地利可秤先。睇埋紐迪高今季主場11場勝仗，有8場能保持清白之身，另外3場則同以一球差距取勝。至於波圖基沙作客聯賽輸8場，其中有四次輸「0:2」，綜合以上因素，紐迪高贏「1:0」同「2:0」都值得一試。

（周一凌晨2時開賽）
項目︰單雙 推介︰帕爾馬雙

周日晚帕爾馬主場對森多利亞，又係開「雙」好時機！其實球隊經常開「雙」，或多或少與和波次數有關係，就好似今場主角之一帕爾馬，暫時七場聯賽三度打和，屬其中一支和波次數較多球隊。而更值得留意係帕爾馬聯賽全部開雙。實在拖連奴、卡坦尼亞、基爾禾及熱拿亞開雙率都偏高，但帕爾馬就拋開上述幾支球隊接近三十個百分點，數字上相當突出。

（周日晚9時開賽）