喜鵲發惡追殺黑貓

猪拉多纳

今晚英超頭場會上演一場「動物大戰」，由「黑貓」新特蘭主場迎戰「喜鵲」紐卡素。新特蘭上仗被破今季聯賽不敗身，作客慘吞曼城3隻光蛋，雖然係咁，「黑貓」今季演出其實唔錯，之前場場有分落袋，主場出擊就更加硬淨未輸過。相反，客軍紐卡素今季一離開主場就會變成「軟腳蟹」，表面睇嚟今場捧主隊好似穩陣啲！之但係睇番兩隊嘅對賽往績，「黑貓」完全無着數，足智彩讓球開平手，小妹寧願信往績撐「喜鵲」。
「黑貓」有卡達莫 巴布爾缺陣

上星期小妹一直好鍾意嘅紐卡素畀曼聯炒咗「三蛋」，中後場班球員畀對手搓到散晒，真係睇到小妹一肚火。雖然話「喜鵲」今季正式比賽作客4和2負未贏過，好在「喜鵲」嘅前線組合丹巴巴亞同柏比斯施斯都有啲貨交到，前者之前兩場聯賽作客都有波入，夾埋仲入咗4球咁多添！相信今晚又係丹巴巴亞發威之時。無錯，紐卡素係啱啱慘敗完，但對手係曼聯都無話可說，今晚呢場同對手咁高咁大，小妹就信佢哋可以連本帶利喺「黑貓」身上攞番，平手盤「喜鵲」信得過。

至於新特蘭唔係唔好，不過小妹覺得領隊奧尼爾嘅戰術偏悶咗啲，加上隊長卡達莫停賽、中堅巴布爾又因傷缺陣，一對中後場悍將齊齊唔出得，試問點頂得住紐卡素兩把黑色尖刀，再睇埋「黑貓」近5次對賽錄得3和2負不勝，往績輸晒平手都撐唔過，所以我會係等佢哋對住強隊受讓先捧場喇！
微博傳情：Roll機即喊最考演技

微電影依家有新路向，我哋將會拍兩個結局，而其中大團圓結局嘅版本將會喺11月時拎去參賽。呢一場戲真係考我演技，要面對鏡頭即時喊！我諗我要及早培養情緒先得。