溫哥華贏「波」即入季後賽

猪拉多纳

歐洲主流聯賽多數都係尾3隊降班，不過當足智彩嘅受注聯賽愈來愈多，我哋認識到部分二線聯賽原來係不設降班制度，又或者接近20隊波角逐都只係得1隊降班，導致冇實力兼冇壓力嘅下游球隊長輸長有，絕對係捧場客嘅長反對象。

上季冇球隊降班嘅日乙同荷乙，今季都增設降班制度，無疑激發起中下游分子嘅爭勝意欲，單係睇吓日乙包尾大幡嘅町田澤維亞，其實近5場聯賽先係輸得兩仗，演出唔算甩轆。不過喺可見嘅將來都唔會有球隊降班嘅美職，分別喺東、西岸暫列榜末嘅FC多倫多及美國芝華士，由於一早已經無緣季後賽，齊齊交出12場不勝走勢，爭勝意欲差到冇人有。
波特蘭緣盡季後賽輸戰意

至於喺美職西岸排尾二嘅波特蘭伐木者，由於都已經緣盡季後賽，表現同樣係不知所謂，唔只6場聯賽不勝，今季作客更係未贏過，聽朝北上加拿大造訪溫哥華白帽，認真係靠唔住。

反觀主場出擊嘅溫哥華白帽，雖然早前都連續7場不勝，但上場終於大炒芝華士4:0，信心返晒嚟，加上今場再取3分的話，就可以趕上西岸季後賽尾班車，成為美職史上首支殺入季後賽嘅加拿大隊伍，戰意毫無疑問遠勝波特蘭伐木者，建議直取2.4倍「讓球主勝」。

（開賽時間：周一早上7:00）
足球重心：溫哥華白帽（讓球主勝）、士砵亭（勝）

馬膽推介：3場(6)喜欣賞

上場跑同程轉彎嗰陣早就移出外疊，根本就係信心十足，贏馬姿態亦大把在手，再跑谷草1800米勝算仍高。