明尼路爭標搏命搶W

猪拉多纳

「細哨」朗拿甸奴攞唔攞到首個巴甲錦標，好睇今晚明尼路主場贏唔贏到富明尼斯，明尼路家陣落後「一哥」富明尼斯9分，贏波先可以保住爭標希望，有晒爭勝決心冇理由唔捧場，1.85倍主勝值得支持。

（now633及660台周一凌晨2:00直播）

明尼路上仗鬥山度士可謂禍不單行，失分之餘仲有中堅拉菲爾馬古斯同指揮官比拿度安尼斯奧撼親頭送院，今仗肯定唔出得。之不過，明尼路晨早落後兩球畀山度士都追得番2:2，證明呢班波後勁凌厲，為爭標鬥心爆晒棚。
朗拿甸奴鬥心返晒嚟

講到鬥心，「細哨」回歸巴甲後真係生性咗好多，呢位滾友前日向巴西《環球體育》表示，攞唔攞到聯賽冠軍睇今鋪，睇得出呢位前世界足球先生見卡卡都能夠鹹魚翻生，激發起佢嘅小宇宙，有佢拍住祖奧攻堅，照計有能力撕破富明尼斯大門。
富明尼斯中後場2將唔踢得

係，富明尼斯對上6場聯賽都未輸過，但佢哋過去24次造訪明尼路只係贏過3次，對賽往績冇優勢。除咗話防守中場桑拉菲爾要坐波監之外，就連另一位悍將艾雲華倫西亞都加入埋十字軍行列，富明尼斯今鋪中後場人腳唔齊，隨時畀明尼路偷到雞。