「去英國化」澳職惡搞

猪拉多纳

澳洲職業聯賽剛開鑼，據知生意好到不得了，這個聯賽水平一般，但勝在揀啱開波時間，成為中港菠菜人士新寵兒。但在其祖家，澳洲人卻興趣欠奉，點催谷都冇乜作用。

今季澳職夠進取，先後有迪比亞路、希斯基、小野伸二等具名氣球員加盟，當中「意甲金童」迪比亞路雖然已將近退休，但畢竟係一代球星，令澳職卡士大增。
澳人始終抗拒英國

點解要搵到迪比亞路？皆因澳職由2005年舉辦至今，入座率認真麻麻，第一季有新鮮感，平均入座率每場超過1萬人，到上年跌至8千人，以人口比率（澳洲人口超過2千2百萬），當然唔係理想數字，即使聯賽有南韓現代汽車做冠名贊助商，亦感到非常吃力，必須諗計求變，增加入場人數。

不過即使金童等過氣巨星駕到，要扭轉澳職劣勢，絕非易事，足球於澳洲向來係非主流運動，反觀澳洲式欖球隨時可以坐滿7、8萬人的大球場。可見澳洲人在運動上極着重自己獨有的文化，澳洲式欖球只在當地流行，出不到國門半步。

澳洲地大物博，係全球面積第6大國家，天然資源豐富，近年經濟比起歐美穩定得多，為全球第13大經濟體，人均國民生產總值排全球第6，為2千萬人口以上的國家中最高。

但於18世紀末，澳洲係英國殖民地初期，當時大英帝國只視其為待開發之地，將大量國內囚犯移送澳洲，「Down Under」這個別稱，表面雖是關乎地理位（澳洲地處南半球，是在世界大部分國家的下面），但亦不無貶意。上述兩個歷史問題，令很多澳洲人始終對英國心生反抗情緒，連帶英國國技足球亦受冷落，英式欖球則改制為澳洲式欖球，總之各行各路。體育歸體育？不要說笑了，以上又是歷史與政治影響體育的又一例子。