辛尼特半場搞掂安德列治

猪拉多纳

今季以天價加盟辛尼特嘅「標王」侯克，目前表現認真一般，係咁畀人話係水貨，不過近排獲前俄羅斯國腳高路杜夫堅力撐嘅佢，今場歐聯C組分組賽主場對住安德列治隨時嚟個大爆發，一開波就搶韁，1.97倍半場主勝要得過。 （有線61、64、201及204、中央5台周四凌晨0:00直播）
前俄國腳勁撐侯克

喺波圖打到曉飛嘅侯克，嚟到辛尼特之後5場俄超只係入得1粒，但初嚟埗到都要畀時間佢同隊友磨合o架嘛，就連前俄羅斯國腳高路杜夫堅都出言力撐：「侯克嚟到要畀時間適應，我唔知辛尼特花幾多錢買佢，但我肯定佢係個好球員。」相信聽見呢番說話嘅侯克，應該減輕唔少壓力啦，再配合埋啱啱喺兩場世盃外都有進帳，幫俄羅斯全取6分嘅基沙哥夫同舒洛哥夫，就算中場丹尼艾維斯要養傷，火力十足嘅佢哋都有力打開分組賽勝利之門。

對手安德列治貴為比甲盟主，今季喺聯賽持續強勢，不過嚟到歐聯舞台就略嫌唔係好夠班，雖然米蘭祖雲奴域同碧基亞喺聯賽有唔錯發揮，衰在去到歐聯就啞晒火，班波喺分組賽都仲未入過波。況且兩名前鋒馬迪亞斯蘇亞雷斯及施里阿斯傷晒，令進攻瓣數更少，鋒力咁弱作客辛尼特隨時得個守字，辛尼特有權早早打開紀錄。

歐聯C組