東歐一哥 歐霸起革命

猪拉多纳

歐洲球壇不嬲畀西歐國家玩晒，東歐波長期唔入流，當然冇癮。但近年俄羅斯、烏克蘭等足球水準提升，國內勁旅逐漸見得大場面，你睇薩克達贏到車仔就知啦！去到歐霸盃，當一眾大牌勁旅懶醒用二線兵敷衍，東歐波行情更為看漲；今輪三支於所屬聯賽位居榜首嘅「東歐一哥」強勢出擊，分撼利物浦、國米、熱刺三大豪門，又睇吓佢哋惡唔惡得出樣！
伊度奧孭飛 安治請紅軍食塵

利物浦A組主場對俄羅斯安治，呢對match up如果年半前踢，主W可能得1.3、1.4倍；但嚟到依家主W去到2倍，讓波都只因紅軍名氣大！計戰意、論卡士，安治優於紅軍，淨係「希丁克＋伊度奧」呢對金鑽組合已經夠殺，今場受讓真係筍到爆炸！（有線61及201台周五凌晨3時05分直播）

舊年年初，俄羅斯礦業大亨克里莫夫買下安治，之後就瘋狂泵水狂買球星，其中以簽入伊度奧最矚目，令呢名頂級射手成為全球人工最高球星，目前陣中擁有基斯杜化森巴同皇馬中場狄亞拉，論卡士一定勝過紅軍班副選。另外，今年2月仲搵埋「神奇教頭」希丁克執教，班波畀佢愈執愈靚，近期接連殺敗莫斯科戴拿模同莫斯科斯巴達，目前高踞俄超榜首，都咪話唔犀利。克里莫夫使咗咁多錢，話到明要於歐戰發威，今季首次殺入歐霸盃分組賽，一班頂級球星當然搏命，戰意有晒保證。
利物浦留力打吡戰

利物浦開宗明義，今季當歐霸盃係練兵場，純粹畀班副選、小將舒吓腳頭，等佢哋唔好雪到硬晒。嚟緊一輪英超紅軍將作客死敵愛華頓，打吡戰當前，今場大家唔使旨意見到謝拉特、蘇亞雷斯等落場，前線會搵丹尼爾柏查高打單箭頭，中堅就會用加歷查同高亞迪斯。「伊度奧攞住個波舞龍咁舞，加歷查喺後面食晒塵」呢個場面，今場將會無間出現。咁嘅局面，安治贏埋有幾咁奇？