十月危城 史雲斯借「細」搗亂

猪拉多纳

曼城歐聯敗走阿積士，主帥文仙尼臨場變陣兼騰雞，盡失球員信任，幾位後防大將乘機作反，內部亂晒龍，今晚回師主場迎擊史雲斯，文帥未有足夠時間平亂，將帥喺尷尬氣氛下勉強合作，贏波為先，不求大炒，大細中位數改為3.5球，要細盤！

（有線300及200台周日凌晨零時30分直播）
曼城籠裏反　文帥亂晒龍

文仙尼到底有幾多斤両，周中喺歐聯關鍵戰役畀晒你睇，對住荷甲球隊阿積士都打穩守突擊，大佬，唔係對緊巴塞皇馬喎，想點先？當曼城需要狂攻之時，文帥決定改踢三後衞，賽後守將米卡李察士透露班球員根本踢唔慣呢個陣，據報尼史葛同基捷基治都唔妥阿頭亂嚟，消息指佢喺更衣室已失民心，有守將要求文帥還原基本步踢番442，公然以下犯上，氣氛相當緊張。

內亂還內亂，波還是要踢，曼城返到英超主場對史雲斯，讓到球半、兩球，齋睇賠率好似贏硬，不過，大軍中場依家唔齊腳，指揮官大衞施華養傷，占士米拿要停賽，魯迪維爾及查維加西亞亦抖緊，最攞命係發電機耶耶托尼都有輕傷，班波創造力不足，上場對住阿積士束手無策，想話靠王牌前鋒阿古路，但佢傷愈後未回復狀態，中鋒迪斯高打正選又冇料到，問題多多，好惡搞！
史雲斯學阿積士嗰招

睇完阿積士技術性擊倒曼城後，史雲斯教頭米高盧特立都話要有樣學樣試吓咁踢，呢班波擅長地面推進，控球能力唔錯，但要作客曼城控制戰局似乎難度太高，倒不如實際啲做好防守同反擊，希望可以偷吓雞。曼城上季喺開咧戰主場對史雲斯大勝4比0，史雲斯半場守和，換邊後散晒失4粒，明顯係初上英超未企穩陣腳，今次碰頭肯定冇咁懸殊，預期入波唔多，細盤值得留意。