皇馬「大」舉侵略小島

猪拉多纳

今晚西甲壓軸好戲，馬略卡於主場硬撼班霸皇家馬德里，兩軍有一個共通點，就係近期防線傷兵一大籮，不過馬略卡前鋒希密特近況弗爆，而皇馬王牌C朗亦不遑多讓，勢必合演一場入球騷，大盤屬不二之選。

（now 633及660周一凌晨4時30分直播）
馬略卡防線穿窿

「小島球會」馬略卡季初一鳴驚人，同堅固防守不無關係，配合保守派教頭卡柏路斯的調教下，一度升上聯賽前三位置。但該隊愈來愈多傷兵，後防更加係重災區，雖然剛從巴塞借得年輕中堅方達斯，但兩位富經驗老將安東尼奧盧比斯同紐尼斯之缺陣，令後場陣腳大亂，近三仗失6球，表現非常騰雞。

皇馬亦唔好得幾多，三大邊防悍將馬些路、法比奧干查奧同艾比路亞仲養緊傷，上周中歐聯作客輸畀多蒙特，串演左閘的艾辛被對方狂轟猛炸，成為一大缺口，加上硬朗防中基迪拉觸傷舊患要抖兩周，令後防雪上加霜。好彩C朗腳風奇順，連續五仗有士哥，而馬略卡箭頭希密特今季已經有6球進帳，配合回勇的墨西哥球星杜斯山度士，實行以攻代守大駁火，大盤實食冇黐牙。