拿玻里無敵主場打爆基

猪拉多纳

意甲球隊拿玻里近年進步神速，趁住AC蘭今季唔掂就霸咗個前列位置，隨時可以挑戰祖雲達斯嘅榜首地位。而本周拿玻里主場對基爾禾，以那不勒斯球隊喺主場嘅優秀演出，要打低基爾禾可謂冇難度，今場可進取多少選擇「讓球主勝」。

（周一凌晨3時45分開賽）
基爾禾遇強腳軟

拿玻里最近就畀有關當局查出，兩年前曾經涉及參與造假事件。突然有負面消息爆出，球員自然會醒醒定定，踢場好波望攞番多少印象分。另外拿玻里主場好少失威，計埋歐霸盃及意甲，拿玻里今季主場賽事全部勝出。而基爾禾依家咁弱勢，拿玻里有主場撐腰應可順利勝出。留意到基爾禾今季遇到前列球隊例必腳軟，之前對國際米蘭、祖雲達斯及拉素都以兩球差距落敗，今次面對拿玻里都係凶多吉少，捧「讓球主勝」。

另外同時間舉行仲有羅馬主場對烏甸尼斯，今季羅馬由進攻大師施文執教，有前冇後打法極具娛樂性，相信今次又會同烏甸尼斯鬥攻，大盤可留意。