另類創富坊

猪拉多纳

項目︰半全場 推介︰祖雲達斯和客

周日意甲頭場卡坦尼亞主場對祖雲達斯，今季「斑馬兵團」狀態長期保持穩定，絕對唔懷疑佢哋嘅爭勝能力，不過今場對住卡坦尼亞就未必可以由頭贏到落尾。實在祖雲達斯鍾意睇定嚟食，上半場經常同對手打和，近期兩場比賽包括歐聯對洛斯查蘭特及意甲對拿玻里，祖雲達斯都係半場打和○比○。故預計今場都會保持一貫作風，頭四十五分鐘先求穩陣，最後四十五分鐘先至施壓制敵，今場宜敲「半和全客」。

（周日晚7時30分開賽）
項目︰第一隊入球 推介︰洛杉磯銀河

美職洛杉磯銀河主場對西雅圖海灣者，第一隊入球捧主隊。銀河於主場踢得特別進取，既有大量球迷入場吶喊助威，球員自然更加起勁。有一項數據要提出，銀河今季喺聯賽主場踢過十六次，當中有十一次都係先取入球。預料今場銀河仍會向海灣者採取主動，第一隊入球開「主隊」嘅機會頗高。

（周一早上9時開賽）
項目︰讓球盤 推介︰巴斯蒂亞平手盤

法甲巴斯蒂亞早前經歷聯賽四連敗，近期表現開始好轉，連盃賽在內保持四戰不敗，其中兩場主場分別擊敗法乙梅斯及特魯瓦，合共攻入六球，有一定入球能力。相反波爾多因要兼顧歐洲賽，已經連續四場比賽未贏過，上周中先作客鬥完葡超馬里迪莫，今場又要作客出戰，平手盤主隊可捧。

（周一凌晨零時開賽）
項目︰單雙 推介︰奧特格寧蘭雙

今日睇中挪超奧特格寧蘭主場對漢福斯，兩支球隊近況都唔好，而睇番聯賽形勢，兩軍都喺中游，距離降班區域分別九分同十分，現時挪超只剩四場，如果打和各取一分對雙方都好，唔夠話默契，但心理上都好，既然和波機會大，玩個「雙」咪幾好囉。

（周一凌晨1時開賽）
項目︰半場大細 推介︰飛燕諾半場大

荷甲飛燕諾主場鬥阿積士，阿積士上周中於歐聯反勝英超勁旅曼城，信心爆棚，加上佢哋踢法一向以攻代守，就算作客一樣會搶攻。飛燕諾整體實力雖稍遜一籌，但勝在有往績支持，單計聯賽近五次主場鬥阿積士只輸一次，有球迷支持亦唔會龜縮。飛燕諾近四場比賽上半場至少都有兩個入球出現，2.15倍「半場大」值博。

（now 639周日晚7時30分直播）
項目︰半場主客和 推介︰町田澤維亞半場和

如果話町田澤維亞同FC岐阜兩個名字，喺日乙代表「魚腩」，相信冇人會反對。兩隊真係曳到爆，否則唔使排包尾同尾二，最大問題係雙方入球能力低，今場海軍鬥水兵，相信都好難見到精彩場面，估計兩隊都係悶戰，「半場和」啱數。

（周日中午12時開賽）
項目︰總入球 推介︰荷華高斯6球

荷甲荷華高斯、海倫芬近期經常上演入球騷，荷華高斯連續3場聯賽都攻入對手3球，包括兩場主場同以3比3打和海牙及阿積士，海倫芬上次作客以3比3打和維迪斯，加埋上周淨勝格羅寧根3比0，同樣連續兩場入3球。翻查往績，荷華高斯近2次主場對海倫芬分別開出「4：2」及「2：4」波膽，總入球都係「6」，可敲10倍總入球「6」。

（周日晚9時30分開賽）
項目︰波膽 推介︰波圖2:0

葡超球隊波圖可謂殺得性起，連同聯賽、盃賽及歐聯已取得四連勝，本周聯賽作客弱隊艾斯杜尼，波圖梗係贏面高啦，不過大炒幾粒嘅機會就唔高。留意到波圖近兩次作客都能擊敗艾斯杜尼，而波軍兩仗都係攻入兩球。睇落波圖對住艾斯杜尼都幾「仁慈」，相信今場都會點到即止，唔會贏到咁盡，揀波圖2:0波膽就最啱數。

（有線155台周一凌晨4時15分直播）