國家打吡祖記晒冷

猪拉多纳

意甲國家打吡，由祖雲達斯主場對國際米蘭。兩支球隊近況俱佳，狀態可謂不相伯仲，但以對賽往績計算，佔主場之利嘅祖雲達斯稍為佔優。無論為爭標或者為面子，今場祖雲達斯都要贏波攞三分，主W可以捧場。

（中央5台周日凌晨3時45分直播）
誓要國米莫拉堤丟臉

早前祖雲達斯對卡坦尼亞出現球證誤判事件，國際米蘭老闆莫拉堤就以「○六年又來了」去諷刺祖雲達斯，而呢句說話就觸動到「斑馬」會長安迪亞阿尼利十萬條神經線，佢即時公開反駁，話國際米蘭同樣受過球證恩惠，莫拉堤只係五十步笑百步。兩隊揸弗人賽前隔空開火，令今場比賽倍添了火藥味。實在安迪亞阿尼利只得三十六歲，後生仔心高氣傲，又點忍得住老狐狸莫拉堤嘅冷嘲熱諷，故近日安迪亞阿尼利就親自走入操練場向球隊落「柯打」，叫所有人當正意國家打吡係決賽咁踢，總之一定要令莫拉堤丟臉。另有意大利媒體爆料，安迪亞阿尼利怒氣未消，講到明唔會同莫拉堤握手，亦唔會安排泊車位畀佢。祖雲達斯對國際米蘭嘅敵對心態已推至高峰，強大爭勝鬥志再配以主場之利，主隊贏波機高。